Meðfylgjandi má sjá niðurstöður aðalfundar Haga hf. sem haldinn var á Nauthól, Nauthólsvegi 106 í Reykjavík þann 27. maí 2025. Fundurinn hófst kl. 15:00. Tillögur fundarins voru samþykktar svohljóðandi:
- Ársreikningur (dagskrárliður 2)
Ársreikningur félagsins fyrir liðið starfsár, ásamt skýrslu endurskoðanda, var lagður fram og samþykktur samhljóða.
- Ráðstöfun hagnaðar (dagskrárliður 3)
Tillaga stjórnar Haga hf. um greiðslu arðs sem nemur 50,0% hagnaðar ársins, án áhrifa matsbreytinga og afkomu hlutdeildarfélaga, eða 2,28 krónur á hlut útistandandi hlutafjár, samtals 2.504 milljónir króna, var samþykkt samhljóða. Arðsréttindadagur verður 30. maí 2025, arðleysisdagur 28. maí 2025 og arðgreiðsludagur 5. júní 2025.
- Breyting á samþykktum félagsins (dagskrárliður 4)
Tillaga stjórnar um breytingu á grein 3.18 í samþykktum félagsins, um dagskrá aðalfundar, var samþykkt samhljóða. Breytingin var eftirfarandi, þar sem viðbætur eru feitletraðar:
- Dagskrárliður 5) Ákvörðun skal tekin um þóknun til stjórnarmanna og undirnefnda
- Dagskrárliður 6) Tillögur félagsstjórnar um starfskjarastefnu og skýrsla starfskjaranefndar
- Dagskrárliður 9) Kosning um utanaðkomandi nefndarmann í endurskoðunarnefnd
- Þóknun til stjórnarmanna og undirnefnda (dagskrárliður 5)
Tillaga stjórnar Haga hf. um 3,5% hækkun stjórnarlauna var samþykkt, þ.e. stjórnarformaður fær greitt kr. 826.000,- á mánuði, varaformaður kr. 608.000,- á mánuði og stjórnarmenn kr. 413.000,- á mánuði. Samþykkt var að laun í endurskoðunarnefnd hækki og verði kr. 110.000,- á mánuði og að laun formanns verði tvöföld upphæð. Laun í starfskjaranefnd hækka og verða kr. 95.000,- á mánuði og laun formanns verða tvöföld upphæð. Þá var samþykkt að nefndarmönnum tilnefningarnefndar verði greitt skv. reikningi 27 þús. kr. pr./klst.
- Starfskjarastefna og kaupréttarkerfi (dagskrárliður 6)
Tillaga stjórnar um óbreytta starfskjarastefnu var samþykkt samhljóða.
- Kosning þriggja fulltrúa í tilnefningarnefnd (dagskrárliður 7)
Samþykkt var samhljóða tillaga stjórnar Haga að þrír eftirtaldir fulltrúar verðir kjörnir í tilnefningarnefnd félagsins.
- Björn Ágúst Björnsson, verkfræðingur
- Kristjana Milla Snorradóttir, mannauðsstjóri
- Tryggvi Þór Haraldsson, fyrrv. forstjóri
- Kosning stjórnar og endurskoðanda (dagskrárliður 8)
Eftirtaldir aðilar voru kosnir í stjórn félagsins til næsta aðalfundar:
- Einar Örn Einarsson, f. 1977
- Eiríkur S. Jóhannsson, f. 1968
- Eva Bryndís Helgadóttir, f. 1972
- Jensína Kristín Böðvarsdóttir, f. 1969
- Sigríður Olgeirsdóttir, f. 1960
Fimm voru í framboði til stjórnar félagsins og var því sjálfkjörið. Fjórir af frambjóðendum skipuðu áður stjórn félagsins.
Samþykkt var samhljóða að endurskoðunarskrifstofan PricewaterhouseCoopers ehf., kt. 690681-0139, verði endurskoðandi félagsins fyrir komandi rekstrarár.
- Kosning um utanaðkomandi nefndarmann í endurskoðunarnefnd (dagskrárliður 9)
Fyrir aðalfundi lá tillaga frá stjórn Haga hf. um að Hannes Ágúst Jóhannesson, löggiltur endurskoðandi, yrði kosinn sem utanaðkomandi nefndarmaður í endurskoðunarnefnd. Var tillaga stjórnar samþykkt samhljóða.
- Ákvörðun um heimild stjórnar til kaupa á eigin bréfum (dagskrárliður 10)
Fyrir aðalfundi lá tillaga frá stjórn Haga hf. um að félaginu verði heimilt að kaupa á næstu 18 mánuðum allt að 10% af heildarhlutafé félagsins, í þeim tilgangi að koma á viðskiptavakt með hluti í félaginu í skilningi laga um markaði fyrir fjármálagerninga eða vegna endurkaupaáætlana eða verðjöfnunar í skilningi reglugerðar Evrópuþingsins og ráðsins (ESB) nr. 596/2014, um markaðssvik, sbr. lög um aðgerðir gegn markaðssvikum. Tillagan var samþykkt samhljóða.
